राजपाद्वारा मधेस आन्दोलनमा दोषी देखिएका तत्कालीन गृहमन्त्री र आइजीपीलाई कारबाहीको माग


राजपा नेपालका सांसद लक्ष्मणलाल कर्णले तराइमधेस तथा थरुहट आन्दोलनका क्रममा भएका घटनाको छानविनप्रतिवेदन तत्काल सार्वजनिक गर्न माग गरेका छन् । कर्णले गिरिसचन्द्र लाल नेतृत्वले तयार पारेको प्रतिवेदन तत्काल सार्वजनिक गर्न माग गरेका हुन् । आज बसेको संसद बैठकमा सांसद कर्णले उक्त प्रतिवेदन सार्वजनिक नगरिए जस्तोसुकै आन्दोलन गर्न पनि पछि नपर्ने चेतावनी दिए ।
‘त्यो छानविनको प्रतिवेदन जनताले थाहा पाउने हो वा आलमणिमा थन्क्याउने हो ? किन सार्वजनिक भएन ? प्रधानमन्त्री किन गम्भिर हुनुभएन ?’ कर्णले संसदमा बोल्दै भने, ‘प्रतिवेदनमा तत्कालीन गृहमन्त्री, आइजीपी को–को दाषी देखिएका छन् उनीहरुलाई कारवाही हुनुपर्छ ।’ कर्णको माग अनुसार सभामुख कृष्णबहादुर महराले सरकारलाई उक्त प्रतिवेदन सार्वजनिक गर्न सरकारको ध्यानाकर्षण गराएका थिए । विगतमा तराइमधेस आन्दोलनका क्रममा झण्डै ६ महिना आन्दोलन भएको थियो । उक्त आन्दोन करिव ७५ जना मारिएका तथा कयौँ अङ्गभङ्ग भएका थिए ।

सो प्रतिवेदन लाल नेतृत्वको समितिले तत्कालिन प्रधानमन्त्री शेरबहादुर देउवा सरकारलाई बुझाएको थियो । तर, सरकारले उक्त प्रतिवेदन अहिलेसम्म सार्वजनिक गरेको छैन । प्रतिवेदनमा परेका ३२६४ उजुरीमाथि छानविन गरेको उल्लेख छ ।


Related posts

Leave a Comment